Ўтаётган ҳар бир кун бизни мамлакатимиз ҳаётидаги муҳим воқеа – Олий Мажлис Қонунчилик палатаси ҳамда маҳаллий Кенгашлар депутатлари сайловига тобора яқинлаштирмоқда. Бу эса жорий йилнинг 27 октябрь куни бўлиб ўтадиган йирик сиёсий тадбирга пухта ҳозирлик кўриш лозимлигини кўрсатади.

205-сайлов участкаси вилоятимизнинг шимолий ҳудудларидан бири – Учқудуқ тумани Дўстлик маҳалласида жойлашган бўлиб, мазкур намунавий сайлов участкасида сайловга ҳар жиҳатдан пухта ҳозирлик кўрилган.

Сайлов участкаси учун ажратилган хоналар қонунчиликда белгиланган талаблар асосида жиҳозланган. Хусусан, зарур техника воситалари – компьютер жамланмалари, телефон, факс, нусха кўчириш аппарати ва тегишли адабиётлар билан таъминланган. Овоз бериш кабиналари, стационар ва кўчма сайлов қутилари тайёрланган. Сайлов қонунчилигига оид маълумотлар, сайловчилар ҳуқуқ ва мажбуриятлари тўғрисидаги тарғибот воситалари билан таъминланган. Яна бир аҳамиятли жиҳати Навоий вилояти ҳудудий сайлов комиссияси аъзоларининг ҳудудлардаги фаолияти ҳам сайлов участкаси аъзоларининг ҳуқуқий билимларини янада мустаҳкамлаш билан бир қаторда ҳар бир участкани сайловга пухта ҳозирлашда ўзининг ижобий самарасини кўрсатмоқда.

- Навоий вилояти ҳудудий сайлов комиссияси томонидан белгиланган Календарь режага асосан сайловга оид барча зарур топшириқлар ва қарорлар ўз вақтида етказиб берилган бўлиб, Марказий сайлов комиссияси томонидан тайёрланган “Сайлов қонунчилиги ва амалиёти бўйича ўқув-услубий қўлланма”, видеороликлар сайлов бўйича билимларимизни янада оширишимизда қўл келмоқда. 205-сайлов участкаси маҳалламиздаги 10-умумий ўрта таълим мактаби биносида жойлашган бўлиб 1 317 нафар сайловчи овоз бериши кутилмоқда. Бугунги кунда биз уйма-уй юрганимизда биринчи маротаба сайловда иштирок этаётган ёшларимизга сайлов тизимига киритилган ўзгаришлар, овоз бериш тартиби, аралаш сайлов тизимининг афзалликлари, шунингдек, ногиронлиги бўлган шахслар учун сайлов куни қандай қулайликлар яратилиши бўйича маълумотлар бериб бормоқдамиз, - дейди 205-участка сайлов комиссияси раиси Гулруҳ Азимова.

Учқудуқ туманида 26 сайлов участкаси тузилган бўлиб, аъзолар сони 2014 нафарни ташкил этади. Ҳудуддаги жами сайловчилар сони эса 28 366 нафардан иборат.